ಕೊರೊನಾ ಸೋಂಕಿನಿಂದ ಸಾವು: ಧಾರವಾಡ ಜಿಲ್ಲೆಗೆ ಐದನೇ ಸ್ಥಾನ

ಧಾರವಾಡ: ಧಾರವಾಡ ಜಿಲ್ಲೆಯಲ್ಲಿ ಕೊರೊನಾ ಅಬ್ಬರದ ಜೊತೆಗೆ ಸಾವಿನ ಸಂಖ್ಯೆಯಲ್ಲೂ ಹೆಚ್ಚಳವಾಗುತ್ತಿದ್ದು, ಇದು ಜಿಲ್ಲೆಯ ಜನರನ್ನು ಆತಂಕಕ್ಕೆ ದೂಡಿದೆ. 

ಈಗಾಗಲೇ ಜಿಲ್ಲೆಯಲ್ಲಿ 29 ಜನ ಕೊರೊನಾ ಸೋಂಕಿನಿಂದ ಸಾವನ್ನಪ್ಪಿದ್ದು, 882 ಜನ ಸೋಂಕಿತರ ಸಂಖ್ಯೆ ಇದೆ. 

ಜುಲೈ 8, 9 ರಂದು 14 ಜನ ಸೋಂಕಿನಿಂದ ಸಾವನ್ನಪ್ಪಿದ್ದರಿಂದ ಜಿಲ್ಲೆಯ ಜನ ಆತಂಕದ ಸ್ಥಿತಿಯಲ್ಲಿದ್ದಾರೆ. 

ಆರಂಭದ ಹಂತದಲ್ಲಿ ಧಾರವಾಡದಲ್ಲಿ ಕೊರೊನಾ ನಿಯಂತ್ರಣದಲ್ಲಿತ್ತು. ಪಕ್ಕದ ಜಿಲ್ಲೆ ಬೆಳಗಾವಿಯಲ್ಲಿ ಸೋಂಕು ರಣಕೇಕೆ ಹಾಕುತ್ತಿತ್ತು. ಆದರೆ, ಇದೀಗ ಬೆಳಗಾವಿಯನ್ನೂ ಹಿಂದಿಕ್ಕಿ ಧಾರವಾಡದಲ್ಲಿ ಕೊರೊನಾದ ನಾಗಾಲೋಟ ಮುಂದುವರೆದಿದೆ. 

ಒಂದು ತಿಂಗಳಲ್ಲಿ ಅತೀ ಹೆಚ್ಚು ಪ್ರಕರಣಗಳು ಹಾಗೂ ಸಾವಿನ ಸಂಖ್ಯೆಯಲ್ಲಿ ಧಾರವಾಡ ಜಿಲ್ಲೆ ಕೆಲ ಜಿಲ್ಲೆಗಳನ್ನು ಹಿಂದಿಕ್ಕಿ ಮುಂದೆ ಸಾಗುತ್ತಿದ್ದು, ಭವಿಷ್ಯದ ದಿನಗಳ ಬಗ್ಗೆ ಚಿಂತಿಸುವಂತಾಗಿದೆ. 

ಜೂ.10 ಮೊದಲ ಸಾವಿನ ಪ್ರಕರಣ: ಧಾರವಾಡದ ಹೊಸಯಲ್ಲಾಪುರದ ವ್ಯಕ್ತಿಗೆ ಮಾ .23 ರಂದು ಮೊದಲ ಕೊರೊನಾ ಪ್ರಕರಣ ದಾಖಲಾಗಿತ್ತು. ಮಾ. 24 ರಿಂದ ಆದ ಲಾಕ್‌ಡೌನ್‌ ಹಾಗೂ ಎಚ್ಚರಿಕೆ ಕ್ರಮಗಳ ಫಲವಾಗಿ ಎರಡೂವರೆ ತಿಂಗಳವರೆಗೆ ಅಂದರೆ ಜೂ.10 ರ ವರೆಗೆ ಜಿಲ್ಲೆಯಲ್ಲಿ ಒಂದೂ ಸಾವು ಆಗಿರಲಿಲ್ಲ. ಲಾಕ್‌ಡೌನ್ ಸಡಿಲಿಕೆ ಬಳಿಕ ಹೊರ ರಾಜ್ಯಗಳಿಂದ ಮೂಲ ಧಾರವಾಡಿಗರು ಆಗಮಿಸಿದಾಗ ಕೊರೊನಾ ಸಂಖ್ಯೆಯೂ ಹೆಚ್ಚಿತು. ಜತೆಗೆ ಜೂ.10 ರಂದು ಮುಂಬೈನಿಂದ ಬಂದಿದ್ದ 58 ವರ್ಷದ ವ್ಯಕ್ತಿ ಕೊರೊನಾ ಸೋಂಕಿಗೆ ಬಲಿಯಾದರು . 

ಹೆಚ್ಚಳ ಯಾವಾಗ ಗೊತ್ತಾ?: ಮಾರ್ಚ್, ಏಪ್ರೀಲ್ ಹಾಗೂ ಮೇ ವರೆಗೂ ಜಿಲ್ಲೆಯಲ್ಲಿ ನಿಯಂತ್ರಣದಲ್ಲಿದ್ದ ಕೊರೊನಾ ನಂತರದಲ್ಲಿ ಏರಿಕೆ ಕಂಡಿತು. ಅದರಲ್ಲೂ ಜೂನ್‌ ಹಾಗೂ ಜುಲೈ ತಿಂಗಳಲ್ಲಿ ಕೊರೊನಾ ಪಾಸಿಟಿವ್ ಜೊತೆಗೆ ಮರಣ ಸಂಖ್ಯೆಯೂ ಏರಿಕೆಯಾಗುತ್ತಿದೆ. ಜೂನ್‌ನಲ್ಲಿ 9 , ಜುಲೈ ತಿಂಗಳಲ್ಲಿ 9 ದಿನಗಳ ಅಂತರದಲ್ಲಿ 18 ಜನ ಮೃತಪಟ್ಟಿದ್ದಾರೆ. ಜಿಲ್ಲೆಯಲ್ಲಿ ಅತೀ ಹೆಚ್ಚು ಕೊರೊನಾ ಪ್ರಕರಣಗಳಿರುವ ಹುಬ್ಬಳ್ಳಿಯವರೇ ಅತಿ ಹೆಚ್ಚಿನ ಪ್ರಮಾಣದಲ್ಲಿ ಮೃತರಾಗಿದ್ದಾರೆ . ಆನಂತರದಲ್ಲಿ ಧಾರವಾಡ, ನವಲಗುಂದ ತಾಲೂಕುಗಳು ಸ್ಥಾನ ಪಡೆದಿವೆ. 

ವಯಸ್ಸಾದವರೆ ಹೆಚ್ಚು: ಜಿಲ್ಲೆಯಲ್ಲಿ ಒಟ್ಟು ಮೃತರಾದ 29 ಸೋಂಕಿತರ ಪೈಕಿ ನವಲಗುಂದ ತಾಲೂಕು ಶಿರಕೋಳದ 34 ವರ್ಷದ ವ್ಯಕ್ತಿ ತೀವ್ರ ಉಸಿರಾಟದಿಂದ , ಸಾಸ್ವಿಹಳ್ಳಿಯ 44 ವರ್ಷದ ವ್ಯಕ್ತಿ ( ಎಚ್‌ಐವಿ ರೋಗಿ ) ಯೊಬ್ಬರನ್ನು ಹೊರತು ಮೃತರಾದ ಉಳಿದ 27 ಜನರು 50 ವರ್ಷ ಮೇಲಿನವರು. 

ಮೃತರೆಲ್ಲರೂ ಕೊರೊನಾ ವೈರಸ್ ಅಲ್ಲದೇ ವಿವಿಧ ಕಾಯಿಲೆಗಳಿಂದ ಬಳಲುತ್ತಿದ್ದರು ಎನ್ನುವುದು ಗಮನಾರ್ಹ. ಕೊರೊನಾ ಪಾಸಿಟಿವ್ ಸಂಖ್ಯೆಯಲ್ಲಿ ಮಕ್ಕಳ ಪಾತ್ರವೂ ಇದೆ. ಒಂದು ದಿನದ ಹಸುಗೂಸು ಸೇರಿದಂತೆ 14 ವರ್ಷದ 20 ಕ್ಕೂ ಹೆಚ್ಚು ಮಕ್ಕಳಿಗೆ ಸೋಂಕು ತಗುಲಿತ್ತು. ಆದರೆ , ಇವರೆಲ್ಲರೂ ಚೇತರಿಕೆ ಕಂಡಿರುವುದು ನೆಮ್ಮದಿ ತರಿಸಿದೆ. 

ಕೊರೊನಾ ಸೋಂಕಿತರು ವಯಸ್ಸಾಗಿದ್ದು , ಸಕ್ಕರೆ ಕಾಯಿಲೆ, ರಕ್ತದೊತ್ತಡ ಇತರ ಗಂಭೀರ ಕಾಯಿಲೆಗಳಿದ್ದವರೇ ಹೆಚ್ಚಿದ್ದಾರೆ. ಈ ಹಿನ್ನೆಲೆಯಲ್ಲಿ ಇನ್ನಾದರೂ ಜನರು ಸ್ವಯಂಪ್ರೇರಣೆಯಿಂದ ಮನೆಯಿಂದ ಹೊರ ಹೋಗದೇ ಎಚ್ಚರಿಕೆ ಕ್ರಮಗಳನ್ನು ವಹಿಸಬೇಕಾಗಿರುವುದು ತುರ್ತು ಅಗತ್ಯವಾಗಿದೆ. 

7 ಮತ್ತು 5 ನೇ ಸ್ಥಾನ ರಾಜ್ಯದ ವಿವಿಧ ಜಿಲ್ಲೆಗಳಿಗೆ ಹೋಲಿಸಿದರೆ ಅತೀ ಹೆಚ್ಚು ಕೊರೊನಾ ಪಾಸಿಟಿವ್ ಸಂಖ್ಯೆಯಲ್ಲಿ ಧಾರವಾಡ ಜಿಲ್ಲೆಯು 7 ನೇ ಸ್ಥಾನದಲ್ಲಿದ್ದರೆ ಕೊರೊನಾದಿಂದ ಅನಾರೋಗ್ಯ ಉಂಟಾಗಿ ಅತೀ ಹೆಚ್ಚು ಮೃತರಾದವರ ಪಟ್ಟಿಯಲ್ಲಿ 5 ನೇ ಸ್ಥಾನದಲ್ಲಿದೆ. 

ಅತಿ ಹೆಚ್ಚು ಮೃತರ ಪಟ್ಟಿಯಲ್ಲಿ ಮೊದಲ ಸ್ಥಾನ ರಾಜಧಾನಿ ಬೆಂಗಳೂರು ( 117 ) ಪಡೆದರೆ 2 ನೇ ಸ್ಥಾನದಲ್ಲಿ ಬೀದರ ( 49 ) , 3 ನೇ ಸ್ಥಾನದಲ್ಲಿ ಬಳ್ಳಾರಿ ( 40 ) 4 ನೇ ಸ್ಥಾನದಲ್ಲಿ ಕಲಬುರ್ಗಿ ( 32 ) ಹಾಗೂ 5 ನೇ ಸ್ಥಾನದಲ್ಲಿ ಧಾರವಾಡ ( 29 ) ಸ್ಥಾನ ಪಡೆದಿದೆ.